कोशी प्रदेशमा पहिलो पटक आयोजना हुन लागेको प्रदेश लगानी सम्मेलन २०८१ का सम्पूर्ण तयारीहरू पूरा भएको प्रदेश लगानी प्राधिकरणले जानकारी दिएको छ।
वैशाख १८ र १९ गते विराटनगरमा हुने सम्मेलनमा लगानी सम्मेलनमा ५४ वटा परियोजनाहरू शोकेसमा राखिएकोमा अहिले बढेर ७१ वटा परियोजनाहरू पुगेको र करिब १ खर्ब ७३ अर्ब ४९ करोड रुपैयाँ बराबरको लगानीबारे छलफल हुने जानकारी दिइएको छ।
बुधबार विराटनगरमा आयोजना गरिएको पत्रकार सम्मेलनमा कोशी प्रदेशका आन्तरिक मामिला तथा कानुन मन्त्री रेवतीरमण भण्डारीले सम्मेलन प्रदेशको समृद्धिको महत्त्वपूर्ण आधार बन्ने बताए।
लगानीमैत्री वातावरण बनाउन प्रदेश सरकारले आवश्यक कानुन अध्यादेश मार्फत संशोधन गरेको र १६ बुँदे प्रतिबद्धता सार्वजनिक गरेको उनले बताए।
सो सम्मेलनमा पर्यटन, कृषि, उद्योग, ऊर्जा, पूर्वाधार, सूचना प्रविधि लगायतका विविध क्षेत्रका परियोजनाहरू समावेश गरिएका छन्।
प्रदेश लगानी प्राधिकरणका प्रमुख कार्यकारी अधिकृत डा.सरोज कोइरालाले कार्यक्रममा २० भन्दा बढी देशका लगानीकर्ता, एनआरएनए तथा निजी क्षेत्रका प्रतिष्ठित व्यवसायीहरूको उपस्थिति हुने जानकारी दिए।
कोइरालाले सम्मेलनमा प्रस्तुत परियोजनाहरूको सम्भावना, लगानीको ढाँचा तथा प्रदेश सरकारको भूमिका विषयमा विस्तृत छलफल हुने बताए।
कोशी प्रदेशको औद्योगिक विकास, रोजगारी सिर्जना र दिगो आर्थिक समृद्धिका लागि यो सम्मेलन ऐतिहासिक कदमको रूपमा हेरिएको आयोजकले जनाएको छ। सो सम्मेलनको उद्घाटन प्रधानमन्त्री केपी शर्मा ओलीले गर्ने बताइएको छ।
