प्रधानमन्त्री केपी शर्मा ओलीले २०७२ सालको भूकम्पले नभत्किने संरचना वा घरहरू बनाउनुपर्ने आवश्यकता देखाएको बताएका छन्।
शुक्रवार काठमाडौँमा आयोजित भूकम्प स्मृति दिवसको कार्यक्रममा उनले राष्ट्रको आर्थिक अवस्था र बजेटले पुनः निर्माण भ्याउन नसक्ने भन्दै क्षति नहुने खालका संरचनाहरू तयार गर्ने, भूकम्पबाट नभत्किने संरचना वा घरहरू बनाउनुपर्ने आवश्यकता रहेको बताए।
उनले भने, ‘हामीले के देख्यौँ भने, २०७२ सालको भूकम्पजस्तो कुरा जतिसुकै रिजिलियन्स भनेपनि राष्ट्रको आर्थिक अवस्थाले, हाम्रो बजेटले, क्षमताले पुनः निर्माण भ्याउन सक्ने अवस्था होइन। त्यसो भएर हामीले पहिले त्यसबाट क्षति नहुने खालका संरचनाहरू तयार गर्ने, भूकम्पबाट नभत्किने संरचना वा घरहरू बनाउनु पर्ने आवश्यकता छ। भत्किनजेल पर्खिने होइन।’
यस्तै, उनले राष्ट्रिय जोखिम न्यूनीकरण तथा व्यवस्थापन प्राधिकरणलाई क्षति नहोस् भनेर पूर्व तयारीमा जोड दिन पनि आग्रह गरेका छन्।
उनले भने, ‘मुख्य कुरा प्राकृतिक विपत्तिसम्बन्धी पूर्वतयारी हो। म राष्ट्रिय जोखिम न्यूनीकरण तथा व्यवस्थापन प्राधिकरणलाई अहिले पनि भन्न चाहन्छु कि पहिले नै त्यस्तो क्षति न होस् भनेर पूर्व तयारीमा जोड दिनुस्। भूकम्प गइसकेपछि भत्किएपछि घरले किचेर मान्छे मारेपछि घर पुनः निर्माण गर्नेभन्दा पहिले नै घर भत्किनै नपाइन, मान्छे किच्नै नपाइन, अलिअलि भएको जायजेथा पनि ध्वस्त पार्न नपाईकन विस्थापित गर्ने बाटोमा लागौँ। क्रमशः यस बाटोबाट हामी सुरक्षित नेपाल निर्माण गर्छौँ।’
उनले सदैव राष्ट्रिय एकता र अन्तर्राष्ट्रिय साथ, सहयोग र समर्थनको उच्च मूल्याङ्कन गर्दै आगामी दिन पनि एकै ठाउँमा हुनुपर्ने बताए।
उनले भने, ‘राष्ट्रिय प्रश्नहरूमा, राष्ट्रिय हितका प्रश्नहरूमा वा यस्ता महत्त्वपूर्ण प्रश्नहरूमा राष्ट्रिय एकता अनिवार्य छ। त्यसै गरेर सुशासन र विकासका प्रश्नहरूमा पनि हाम्रो राष्ट्रिय एकता अनिवार्य हुनुपर्दछ। लोकतन्त्रमा प्रतिस्पर्धा हुन्छ। प्रतिस्पर्धालाई स्वस्थता र सत्यमा आधारित स्वस्थताको माध्यमबाट अगाडि बढाउनु पर्दछ। आलोचना स्वागत छ र स्वागतयोग्य हुन्छ। तर आलोचना सत्यमा आधारित, तथ्यमा आधारित, रचनात्मक आलोचना होस् न कि झुटमा आधारित, असत्य र भ्रामक एवं विनाश निम्त्याउने खालको, नेपाली समाजलाई भाँड्ने, विभाजित खालको होइन। राष्ट्रिय एकतामा आबद्ध गर्ने खालको होस्। यस कुरामा हामीले ध्यान दिनुपर्दछ।’
