नेपाल प्रहरीको महानिरीक्षकमा चन्द्रकुवेर खापुङ नियुक्त भएका छन्।
शुक्रबार मध्यान्ह बसेको मन्त्रिपरिषद्को बैठकले पहिलो वरीयतामा रहेका अतिरिक्त महानिरीक्षक (एआईजी) खापुङलाई नेपाल प्रहरीको ३२औँ महानिरीक्षक बनाउने निर्णय गरेको हो।
वर्तमान प्रहरी महानिरीक्षक दीपक थापा अगामी भदौ १८ गतेबाट अनिवार्य अवकाशमा जाँदैछन्। खापुङलाई नयाँ आईजीपी बनाइएको हो। नवनियुक्त आईजीपी खापुङले अगामी भदौ १९ गतेदेखि कार्यभार सम्हाल्ने छन्। खापुङको कार्यकाल अहिलेसम्कै छोटो रहनेछ। प्रहरी नियमावलीअनुसार उनी २६ कात्तिकमा अवकाशमा जानेछन्।
यसअघि महानिरीक्षक थापाले आफ्नो कार्यकाल लम्ब्याउन जोडबल गरे पनि सफल हुन सकेनन्।
प्रधानमन्त्री केपी शर्मा ओली शनिबार चीन भ्रमणमा जाँदैछन्। चीन जानुअघि नै नयाँ आईजीपीमा खापुङलाई नियुक्त गरिएको हो।
वर्तमान प्रहरी महानिरीक्षक दीपक थापा १८ भदौ राति १२ बजेदेखि अनिवार्य अवकाशमा जाँदैछन्। प्रहरी नियमावलीमा उल्लेख ३० वर्षे सेवा अवधिका कारण उनी अनिवार्य अवकाश जान लागेका हुन्।
१९ भदौ २०५१ मा प्रहरी निरीक्षक (इन्स्पेक्टर) मा भर्ना भएका थापा ५ चैत २०८१ मा आईजीपी भएका थिए। उनी ६ महिना प्रहरी प्रमुख बने। अब खापुङले उनलाई विस्थापित गरेका छन्।
खापुङ ३२ औँ आईजीपीका लागि आफ्नो ब्याचका एकल प्रतिस्पर्धी हुन्। केन्द्रीय अनुसन्धान ब्यूरो (सीआईबी) को निर्देशक रहेका खापुङले वर्तमान आईजीपी थापासँगै इन्स्पेक्टर भर्नामा प्रतिस्पर्धा गरेका थिए।
