अछाममा रजस्वलाको बेला छाउगोठमा सुतेकी एक महिला र बालिकाको ढुंगाले लागेर मृत्यु भएको छ।
पञ्चदेवल विनायक नगरपालिका–८ सेलापानीमा घर नजिकै खेतबारीमा छाउगोठमा सुतिरहेका बेला माथिबाट खसेको ढुङ्गा लागेर ३५ वर्षीया निम खनाल र ७ वर्षीया बालिका कविता भण्डारीको घटनास्थलमै मृत्यु भएको प्रहरीले जनाएको छ।
उनीहरुसँगै सुतेकी मृतक बालिकाकी आमा ३६ वर्षीया रत्ना भण्डारी घाइते छन्। उनलाई उपचारका लागि बारला स्वास्थ्य चौकी पठाइएको छ।
पञ्चदेवल विनायक नगरपालिका–८ का वडा अध्यक्ष छत्रबहादुर शाहीका अनुसार महिनावारी बार्न भनेर दुवै जना महिला छाउगोठमा सुतेका थिए। रत्नाकी सात वर्षीया छोरी कविता भने आमाको माया लागेको भन्दै सँगै सुतेकी थिइन्। मृतक खनाल र भण्डारी दुवै जना माइत आएका थिए।
यस घटनाबारे थप अनुसन्धान भइरहेको प्रहरीले जनाएको छ।
