सञ्चार तथा सूचना प्रविधि मन्त्री पृथ्वी सुब्बा गुरुङले समानुपातिक समावेशी प्रणालीले गर्दा नेपालमा अस्थिरता आएको बताएका छन्।
शुक्रवार काठमाडौँमा आयोजित आदिवासी जनजाति उत्थान राष्ट्रिय प्रतिष्ठानद्वारा प्रकाशित पुस्तकहरूको लोकार्पण समारोहमा उनले समानुपातिक समावेशी प्रणालीको कारण अस्थिरता आएको उनीहरूको बुझाई रहेको भन्दै पार्टीका नेताहरू यो प्रणाली हटाउने कुरामा बढी केन्द्रित भएको बताए।
उनले भने, ‘पार्टीका नेता, सांसदहरू बोलेको सुन्नु हुन्छ होला, उहाँहरूले समानुपातिक प्रणाली हटाउनु पर्छ, भनेर कराइ रहेका छन्। तर अहिले सम्म पार्टीका नेता केपी ओली, देउवा प्रचण्ड उहाँहरूलाई के महशुस भइरहेको छ भने समानुपातिक समावेशी प्रणाली हटाउन सकिदैँन अहिलेलाई त्यसको व्यवस्थापन कसरी गर्ने भन्नेमा छ।
संविधान संशोधन पनि यो कुरामा बढी केन्द्रित छ । किनभने उनीहरूको बुझाई के छ भने सङ्घीयता विरोधीहरू पनि त्यहीबाट प्रवेश गरिरहेका छन् । यो समानुपातिक समावेशी प्रणाली आएको कारणले गर्दा नेपालमा कहिले पनि स्थिरता नहुने भयो, भन्छन् उनीहरू तर स्थिरताको लागि पूर्ण समानुपातिकमा जानु पर्छ भनेर किन भन्न सक्दैनन्।’
यस्तै, उनले स्थिरता भनेको निर्वाचन प्रणालीको मात्र कुरा नभई दलहरूको व्यवहारको कुरा पनि भएको भन्दै प्रणालीमा सुधार गर्नुभन्दा अगाडि दलहरूको कार्यशैलीमा सुधार आउनु पर्ने बताए।
उनले भने, ‘स्थिरता भनेको निर्वाचन प्रणालीको कुरा मात्र होइन दलहरूको व्यवहारको कुरा पनि हो। उनीहरूको कार्यशैलीले पनि हो, मिलेर काम गर्ने हो भने स्थिरता भई हाल्छ नि। प्रणालीमा सुधार गर्नुभन्दा अगाडि दलहरूको कार्यशैलीमा सुधार आउनु पर्छ। समानुपातिक प्रणालीको वकालत दलहरूले किन गर्दैनन् भन्दा उनीहरूको मानसिकता त्यहाँसम्म पुगेको छैन होइन भने समानुपातिक समावेशी प्रणाली सबैभन्दा सस्तो प्रणाली हो।’
