धनकुटा महालक्ष्मी नगरपालिका-१ कटहरेका ४३ वर्षीय डम्बर मगरको विषाक्त मदिरा सेवनका कारण मृत्यु भएको थियो।
वैदेशिक रोजगारीको सिलसिलामा दुई वर्षदेखि कुवेतमा रहेका श्रीमानको अचानक निधन भएको खबर सुनेपछि श्रीमती ३३ वर्षीया विद्यालाई झट्का लाग्यो उनी स्तब्ध भइन्। पति कुवेतमा बितेको पाँच दिनपछि विद्याको पनि निधन भएको थियो।
आमा र बुवाको पाँच दिनको फरकमा निधनपछि तीन छोरी १७ वर्षीय विपना, १६ वर्षीय सञ्जु र २ वर्षीय संयुक्ताको बिचल्ली भएको छ।
वडाध्यक्ष टेकबहादुर गुरुङले डम्बरबहादुरको निधन विषाक्त मदिरा पिउँदा भएको खबर आए पनि खास कारण पुष्टि हुन नसकेको बताएका छन्।
दुवै जनाको निधनका कारण गाउँ नै शोकमग्न भएको गुरूङले बताए। ‘श्रीमानको मृत्युको खबर सुनेपछि श्रीमतीको पनि दुखद निधन भयो,’ उनले भने, ‘पति वियोगको पीडामा रहेकी श्रीमतीको पनि मृत्यु भएपछि छोरीहरूको बिचल्ली भएको छ।’
अचानक आमाबाबु गुमाएका छोरीहरूको पठनपाठनसहित दैनिक जीवन सहज बनाउन पहल भइरहेको वडाध्यक्ष गुरुङले बताए।
डम्बरको शव भने अझै कुवेतमै छ ।
