थाइल्यान्ड भ्रमणमा रहेका निबन्धकार तथा नियात्राकार युवराज नयाँघरेले थाई नेपाली ‘आदर्श’ पुस्तकालयको अवलोकन गरेका छन्।
थाई नेपाली सङ्घ, बैंकक शाखा शिक्षा विभागद्वारा ‘सियेकवान्खेक’मा स्थापित आदर्श पुस्तकालयमा पुगी मदन पुरस्कार विजेता नयाँघरेले थाइल्यान्डको नेपाली समाज र युवा साहित्य प्रेमीसँग छोटो भलाकुसारी गरेका हुन्।
थाइल्यान्डमा नेपाली पुस्तकालयको स्थापना गरी नेपाली ‘भाषा—साहित्य’मा रुचिकर प्रवासी नेपाली विद्यार्थीहरूलाई सहज रूपमा पुस्तक अध्ययन गर्ने सुविधा प्रदान गरेको भन्दै उनले प्रशंसा पनि गरे।
पुस्तकालयको अवलोकन गर्न ‘सामाजिक भवन’ पुगेका नयाँघरेलाई साहित्य मन थाइल्यान्डका अध्यक्ष तथा थाई नेपाली सङ्घ, बैंकक शाखा शिक्षा विभाग प्रमुख ओमप्रकाश न्यौपानेले स्वागत गरेका थिए।
‘आदर्श’ पुस्तकालयका पदाधिकारी तथा साहित्य मनका पदाधिकारीहरूले पुस्तकालयको अवलोकन गर्ने क्रममा नयाँघरेबाट थप सल्लाह मागेका थिए।
त्यस्तै, नेपालबाट लैजान सक्ने नेपाली साहित्यका उपयोगी पुस्तकबारे छलफल समेत गरे। थाइल्यान्डमा रहेको नेपाली समुदायमाझ नेपाली भाषा—साहित्यको विकास गर्ने उद्देश्यले पुस्तकालय स्थापना गरिएको साहित्य मन थाइल्यान्डका अध्यक्ष न्यौपानेले बताएका छन्।
‘आदर्श’ पुस्तकालयको प्रबद्र्धनमा थाई नेपाली सङ्घ बैंकक शाखाका अध्यक्ष रामकुमार ढुङ्गानासहित शिक्षा विभाग प्रमुख ओमप्रकाश न्यौपाने र साहित्य मनका पदाधिकारीहरू दीपा राना, डेविड् अल्विन राउत, राज पौड्याल, रविचन्द्र अधिकारीलगायत खटिएका छन्।
