मोरङको केराबारीका पूर्वअध्यक्ष र उपाध्यक्षसहित १४ जना माओवादी कार्यकर्ताले सामूहिक राजीनामा दिएका छन्। राजीनामा दिने अधिकांश व्यक्ति सशस्त्र द्वन्द्वदेखि नै माओवादी राजनीतिसँग आबद्ध हुँदै स्थानीय तहसम्म जिम्मेवारी सम्हाल्दै आएका नेता हुन्।
२०७९ सालमा माओवादीबाट गाउँपालिका अध्यक्षका उम्मेदवार बनेका तिलक थापामगर, उपाध्यक्ष भक्तशेर लिम्बू, पार्टी सचिव किशोर राई, १० नम्बर वडाका संयोजक प्रेम लावती, वडा सचिव प्रेम ठकुरीलगायतले पार्टी परित्याग गरेका हुन्।
यस्तै, दुईपटक वडा अध्यक्षका उम्मेदवार बनेका नेतादेखि वाइसिएल संयोजक, वडासचिव लगायत महत्त्वपूर्ण जिम्मेवारी सम्हाल्दै आएका कार्यकर्तासमेत राजीनामाको सूचीमा छन्।
