काठमाडौं महानगर–८ जयबागेश्वरी गायत्री मार्गमा रहेको छैटौँ शताब्दीको ऐतिहासिक ब्रह्मा मन्दिरको पुनः निर्माण गरिएको छ।
आज ब्रह्मा मन्दिरको उद्घाटन काठमाडौं महानगरका प्रमुख बालेन्द्र शाह र उपप्रमुख सुनिता डंगोलले गरेका छन्।
मन्दिरको उद्घाटन पछि महानगर प्रमुख बालेन्द्र शाह कार्यक्रमबाट बाहिरिएका थिए। कार्यक्रममा उपप्रमुख डंगोलले छैटौँ शताब्दीको ऐतिहासिक ब्रह्मा मन्दिर पुनः निर्माण हुन ऐतिहासिक कार्य भएको बताइन्। डंगोलले सम्पदा संरक्षणमा महानगरले प्रमुखताका साथ काम गरिरहेको उल्लेख गरिन्।
महानगरबाट हराएका मूर्त तथा अमूर्त सम्पदाहरूलाई पुनर्स्थापन गर्ने काम गरिरहेको र अन्य देशमा रहेका नेपालका मूर्तिहरूलाई स्वदेश फर्काउन पनि पहल गरिरहेको उनले बताइन्।
काठमाडौं महानगर वडा ८ का वडाअध्यक्ष आशामान संगतले दुई तल्ला रहेको प्यागोडा शैलीमा मन्दिर निर्माण गरिएको जानकारी दिए।
उक्त ऐतिहासिक मन्दिरको गत माघ ७ गते पुनः निर्माणका लागि शिलान्यास गरिएको थियो। हराएकै एक सय वर्षभन्दा धेरै समय भएको मन्दिरको ऐतिहासिकता उत्खनन गरिएको हो।
